ضع علامة صح أو غلط

أحيانا وفي لحظات التأمل أو إعادة فتح الملفات القديمة أسأل نفسي ذلك السؤال هل أنا كنت على حق ؟ هل أنا على حق الأن ؟ يا تري أنا فعلا صح ولا بيتهيأ لي !!!!!!!!!
بالطبع وبعد مناقشات حادة وأخذ وشد وهات وخد بيني وبين عقلي وذاتي أحاول إقناع نفسي بأنني كنت على حق دائما وإن خانني التوفيق في بعض الأحيان، بعد كل ذلك لم اصل إلى الحقيقة وإنما إلي امنيات الحقيقة.

وهذا نص الحوار بيني وبيني عقلي
أنا : ......................................................؟
عقلي : أيوة أنا كنت صح حين قررت دخول كلية الإعلام وفضلتها عن معهد السينما ، إية مجموعي كان كبير خسارة يضيع كدة . والسينما كمان في ناس بتقول إن مجالها مش نضيف وصعب الواحد فيها يحافظ على دينه ، يبقي أدخل إعلام أحسن .

أنا...................................................؟
عقلي : أيوة أنا كنت صح لما نقلت من قسم علاقات لصحافة ، هما بتوع علاقات دول حيلاقوا شغل اساسا ، أما الصحافة ح تشبع لي هوايتي في الكتابة وكل الناس تقرا اللي انا بكتبه وح اعمل حاجة بحبها .

أنا : .......................................................؟
عقلي: أيوة أنا كنت صح ودايما صح علشان ببيع أي حد بحس إنه (خائن وجبان وعميل) على رأي داليا البحيري ، وهو اية لازمة الإنسان او الصديق او الحبيب لو مكنش عنده وفاء للطرف الآخر.

أنا :..........................................؟
عقلي :أيوة أنا صح علشان بصمم على اللي في دماغي ومش بغير رأي بسهولة، بس في الحاجات المهمة بس اما في الهيافات مش بدقق كتير كله ماشي، ما هو طبعا لازم الواحد يكون عنده هدف في حياته ومبادئ ولا أية لازمة العيشة أساسا .

أنا:.....................................................؟
عقلي: انا صح طبعا علشان أجلت تفكير في موضوع السفر للخارج وقولت اصبر شوية على البلد دي، يعني هي اوروبا ولا كندا ولا حتى نيوزلندا ح يطيروا مهم قاعدين وفي أي وقت اسافر . ومفيش أحسن من (أم الدنيا مصر) يا حبيبتي يا مصر يا مصر.


أنا:..................................................؟
عقلي: اهو في دي بالذات أنت صح أوي ، وانت يعني كنت ح تعمل اية؟ ماهي الظروف اللي حكمت بكدة( معلش مش ح اقدر اوضح اكتر من كدة)


كل واحد شايف نفسه صح ومحدش صح غيره وهو الواد وهي البنت النابغة ، بس انا بيتهيألي أني غلطت في حاجات كتير !! لو حد عارف حاجة يقولي علشان انا مش مصدق عقلي ؟